Ĕнер, кăрлачăн 25-мĕшĕнче, Патăрьелĕнчи тĕп библиотекăра чăваш халăх поэчĕ Петĕр Хусанкай çуралнăранпа 105 çул çитнине халалланă поэзи сехечĕ иртрĕ.
Библиотека ĕçченĕсем Шупашкартан илсе килнĕ «Пусть горит моя звезда» электронлă диск пăхрĕç, поэтăн тĕрлĕ çулсенче çырнă сăввисене итлесе аса илчĕç.
Мероприятие вулавăшăн краеведени уйрăмĕн ертÿçи Нина Мазякова поэтăн «Мехел тени мĕскер тени пулать?» сăввипе уçрĕ, поэтăн ĕçĕ-хĕлĕ çинчен каласа кăтартрĕ.
И.Ульянов ячĕпе хисепленекен Чăваш патшалăх университетĕнчен вĕренсе тухнă библиотекарьсем П.Хусанкайăн ывăлĕ, Атнер Хусанкай çинчен те аса илсе ыррине каласа пачĕç. Наталия Ракова библиотекарь вулав залĕнче йĕркеленĕ «Эпир пулнă: пур: пулатпăр!» кĕнекесен выставкипе паллаштарчĕ.
Мероприятине хутшăнакансем П.Хусанкай сăввисенчен хывнă юрăсене итлесе киленчĕç. | 
